﷽
مدحة : الماحي المكرم ديمة في بالي
الراوي : حاج الماحى رحمه الله
الماحي المكرم ديمة في بالي
يا الرسول سيدي الغالي
...
القادر المريد الباقي فعّالِ
ثابتلو الوجود والعدم انفالي
فاني خلايقو مالك الملك هو التالي
...
ثنيت بي رسولنا المصطفى الغالي
قنديل المدينة الديمة في بالي
أب حباً حرق جوفي وسلب حالي
يا حليل ذاك مقامو وعنبرو الحالي
...
لاح النور على أوجان النبي يلالي
كيف بدر التمام الضاوي فعّال
فاق يوسف جمالو الما بيخصالي
مايق العين يسر لي شوفتو ينكالي
...
سلطان الحقيقة الما هو أفسالِ
ما بيربط طريق ما بينجي فلّالِ
ما كاذر ضعيفاً قالّو واجبالي
الجور والظلم مو حقو حاشا علي
...
إن كان الرسول بيدخر المالِ
جاتو الدنيا كيمان ذهب وجبالِ
أعرض عنها وقال ما بتبقالي
قال دار الخلود إياها منوالي
...
أقلب يا لسانى وشكِّر المعروف
قنديل المدينة البي الكرم موصوف
النبي التطوف ليهُ الملائكة صفوف
شافع المذنبين يومت يبين الخوف
...
من بعد النبي بشكر الصديق
صهر المصطفى وصاحلو العلِي التحقيق
إن شال في الصفوف منه الخصيم ما بفيق
إن قُت يا الخليفة عليك يفرج الضيق
...
من بعدهم بشكِّر ولدة الخطاب
عز الدين جهر فاروق كلامو صواب
إن لاقى الخصيم يملالو خشمو تراب
إن قُت يا عمر في ساعة خاطرك طاب
...
من بعدهم بشكِّر سيدي عثمان
حبراً تستحيه ملائكة الرحمن
فارس العوق منفل تالي بالقرآن
إن قُت يا ذا النورين يجيك عيان
...
من بعدهم بشكِّر سيدي الكرار
كيفِن سوى بالبطريق مع الهبّار
إن دخل الصفوف تتصارح الكفار
وإن قُت يا علي يأتيك زي النار
...
قول يا مرحباب الليث أبي الحسنين
الفارس الشجيع الما بيهم بالدين
إن دفر كدي يعجب الرسول الزين
وإن قُت يا علي يسبق رَمِشة العين
...
من بعدهم بشكِّر طلحة فارس الخيل
يومت في أُحُد ذكر الرسول بالحيل
الجرحات عليه والدماء كالــسيـل
العيقان يسوقِن ديل عليهم ديـــل
...
من بعدهم بشكِّر للزبير يا اخي
فارس الميتم أب رأياً سديد مو ني
ركب قارحو دفَّر فوق مليح الزي
قال جملة اليخالف ليك حماتو علي
...
من بعدهم بشكِّر لي سعد قلّب
فارساً في الجهاد باين كلامو عجب
واحدين حدّ روسُهم دمهم يشخب
واحدين جابا بالجنزير ملاها شِعَب
...
من بعدهم بشكِّر لي سعد مو دون
راكب قارحو شايل القاطع المسنون
إن شُف لي قتيلو الفي المحاص مطعون
الصقّار تنشّل لي كلى الملعون
...
من بعدهم بشكِّر لابن عوف ما بخاف
الفارس اليسوق الحافلة أم لصّاف
راكب قارحو ياخذ الراس من الأكتاف
والعيقان يلاقيها إن بقت آلاف
...
من بعدهم بشكِّر أبا عبيدة أنا
فارساً في الجهاد باين تشوفو سنا
وهّن قارحو في الريشة أم غبار وقنا
ما بيضرب بلا أب تاج وأب سوار معنى
...
بعد العشرة قول لي حمزة الهيوش
فرتيقة الخيول يعجب دليل في البوش
فوق الراس يوابر بي سنينو ينوش
تلقى الزول مدردق بالنصف مقفوش
...
من بعدهم بشكِّر سيدي العباس
الفارس المنوفس طيب الأجناس
قال لي ود أخيه أحمد خيار الناس
ليك الحي نهينو والقتيل لا بأس
...
بعد أعمامو جعفر والعقيل أحباب
لا تنسى الفضل ديل للنبي قُرّاب
شايلين السنين القاطع السكّاب
الروم دمروها وخلوا دارا خراب
...
من بعدهم بشكِّر لي سعد وقّاص
ناس الربيع فارس أم فتيل ورصاص
شايلين السنين اللي الكفر قصاص
واليعتَر بَهُمْ قط ما في ليه خلاص
...
من بعدهم بشكِّر للمنير وزُهير
فرساناً يربطوا الرأي مع التدبير
الميت يكفوبو السباع والطير
والحي كتفوه وجابوهُ بالجنزير
...
للملك العرمرم وابن معدِ بقول
فرسان الجهاد الما مثيلهم زول
في الدردار يشدق أربعين مقتول
هز فوق الرسول يمشي العرض والطول
...
من بعدهم بشكّر لي عكاش وتميم
الكندي ودرار خالد شجيع وصميم
يات من كان مِتِل ليث المَصَنّة يزيم
الدين وقفوه وهدوا الحلل لا إبريم
...
أقلب يا لسانى وجيب كلاماً صَٓح
شكِّر للصحابة الكلهم نُجّاح
ديل فرسان قبيل الأتقياء الصُلاح
يا حليلهم ليوث العوق زمانهم راح
...
أقلب يا لسانى ورتب الكلمات
شكِّر للصحابة الكلهم سادات
ديل فرسان قبيل الختو للبطولات
الدين وقفوهُ وفازوا للجنات
...
اللهم صلي على الرسول كرات
وأرض لوالديه وأرض للزوجات
للزهراء وزينب ثم والعمات
وأم كلثوم رقية بِضعتو الطاهرات
...
اللهم صلي على الرسول الزين
وأقري سلامي لجد الحسن وحسين
أولاد النبي ساداتنا السبطين
يا ربي بي جاهم ننجى في الدارين
...
اللهم فرج همي يا ستار
وأحفظ للعبيد الهاجروا وزوار
يا حي يا مغيث يا مولّي للأدبار
هوّن يا مهوّن وأرخِص الأسعار
...
الماحي بيقول يا كابي فيك ظني
خايف من ذنوباً فوقي لقنّي
يا دخري حمولاً دلهُن مني
جنب ناس الحسين والزهراء سكّنّي
...
محتسبك وقيع باخواني تضمنّي
للحاج أب سعد وخالو المواصلني
لِم علي والبشير والحاج ولد فنّي
ليهم مكفلات حوراَ يعجبِنّي
...
الصلاة والسلام لي سيدي السني
بي عدد الملائكة الإنس والجن
تملا السبعتين تصل النبي تهني
إن شاء الله الكريم بي جاهو يقبلني
...
صلى الله عليه وسلم
كتابة : أبو حميد ٢٠٢١
تعليقات
إرسال تعليق